یقیناً کچھ بڑے عشاق کے

یقیناً کچھ بڑے عشاق کے رتبے گھٹے ہوں گے
ہماری دھول سے جب دشت کے ٹیلے اٹے ہوں گے

ابھی دریاؤں سے اپنی زمینیں مت طلب کرنا
ابھی سیلاب کے ریلے کہاں پیچھے ہٹے ہوں گے

غریبوں کے مکانوں میں کوئی خامی تو رہتی ہے
در و دیوار پختہ ہوں بھی تو پردے پھٹے ہوں گے

انہیں سالار کی بڑھتی ہوئی دولتِ سے کیا لینا
سپاہی تو سپاہی ہیں محاذوں پر ڈٹے ہوں گے

بڑا سلجھا ہوا پانی ہے کوئی چھت نہیں ٹپکی
کسی کی آنکھ میں ٹھہرے ہوئے بادل چھٹے ہوں گے

کسے آداب آتے ہیں جھجک کر بات کرنے کے
ہمارے بعد شہزادی کے دن مشکل کٹے ہوں گے

اسے تحفے میں بھیجوں گا پرانی ڈائری ساجد
کئی الفاظ گم ہوں گے کئی صفحے پھٹے ہوں گے

لطیف ساجد