من بگھیا ما ساجن ناہیں

من بگھیا ما ساجن ناہیں راس نہ موہے رنگ
دیوالی کے دیپ جلے ہوں یا ہولی کے رنگ
۔
جب پیتم سے نینا لاگے مانگ بھرا سندور
ورنہ پھیکے پڑ جاتے تھے اس سے پہلے رنگ
.
اک کمرے میں عمر گزاری پر سوچیں متضاد
دل ڈھونڈے احساس کے رشتے آنکھ تلاشے رنگ
.
تو موجود ہے ہر ذرّے میں ہر شے تیرا روپ
وارث ، بلّھا ، نانک ، باہو ، مولا تیرے رنگ
.
رنگ نہیں اجمیری مرشد کیسے نظر کرے
جا اجمیر تو رنگ لہا کے دل دے بوہے رنگ
.
آ جا ساجن بیساکھی میں آئے سب کے پیت
میلیں میلی پوشاکیں اور کالے کالے رنگ
.
رانجھن آیا ہے بیلے میں ست رنگی ہے شام
پورب۔ پچّھم، اتر، دکّشن ہر سو پھیلے رنگ
.
لَآ اِلٰهَ اِلَّا اللّٰهُ ہر دم نال پکار
کلمہ ورد بنا لے ساجدؔ لگ جاویں گے رنگ
۔
لطیف ساجد