ایک تو نے جو کی وفا ہی نہیں

ایک تو نے جو کی وفا ہی نہیں
اب کسی سے کوئی گلہ ہی نہیں

میں عبث ڈھونڈتا ہوں بستی میں
اس جہاں میں کہیں وفا ہی نہیں

قتل کیسے مری انا ہوگی
لب پہ میرے جو التجا ہی نہیں

کیوں ڈراتے ہو مجھ کو طوفاں سے
میرے گھر میں کوئی دیا ہی نہیں

کیسی میزان لے کے بیٹھے ہو
اپنی خاطر تو میں جیا ہی نہیں

نکل آیا ہوں خوف رد سے میں
میرا دست دعا اٹھا ہی نہیں

عمر گزری تو جان پایا ہوں
زندگی سے بڑی سزا ہی نہیں

شہر گھوما تو یوں لگا عاجزؔ
اپنا دنیا میں کوئی تھا ہی نہیں

ڈاکٹر الیاس عاجزؔ