تِتلیوں کے پَر پہ لِکھی داستاں

تِتلیوں کے پَر پہ لِکھی داستاں سمجھا تھا میں
زندگی کو الفتِ شُعلہ رُخاں سمجھا تھا میں

چار دن کی زندگی کو جاوِداں سمجھا تھا میں
یہ حقیقت بَر سرِ نوکِ سِناں سمجھا تھا میں

تُو مِرے دل کے نہاں خانے میں ہے کب سے مکیں
دَردِ جاناناں تجھے تو لا مکاں سمجھا تھا میں

دل کی مُٹھی میں سِمٹ کر آگیا غم آپ کا
وُسعتِ دردِ جہاں کو بیکراں سمجھا تھا میں

نِیلگوں طشتِ فلک پر جا بہ جا بِکھری ہوئی
کہکشاں کو کانچ کی کچھ کِرچِیاں سمجھا تھا میں

چار سُو پھیلے اُفق کو بَھول پن میں آج تک
حد زمین و آسماں کے درمیاں سمجھا تھا میں

باغ کے اِک کُنج میں کِھلتے ہُوئے پھولوں کے بِیچ
دوڑتے بچوں کو رنگیں تِتلِیاں سمجھا تھا میں

وہ ہی میری بخشِشِ عُقبیٰ کا باعث بن گئی
جس دُعائے نِیم شب کو رائیگاں سمجھا تھا میں

عُظمی جٙون