ابھی پات جھڑنے کی رت کہاں، ابھی اور کِھل
اے گلابِ چشمِ محبتاں ، ابھی اور کِھل
رمِ دردِ شعلۂِ نا صبور ،مچل ذرا
خُمِ چاکِ ہجرِ عزیزِ جاں ، ابھی اور کِھل
ابھی منزلِ رہِ خستگاں بڑی دور ہے
اے غبارِ جادۂِ بے کراں ، ابھی اور کِھل
ابھی میرا چہرہ نہیں دھلا سمِ اشک سے
اے تبسمِ لبِ رشکِ جاں ،ابھی اور کِھل
ابھی نورِعشق نے آسماں کو نہیں چھوا
سو غرورِ چہرۂِ عاشقاں ، ابھی اور کِھل
غمِ عاشقی میرا حسن ماند نہیں پڑا
تری سرخیوں کو نہیں خزاں، ابھی اور کِھل
ابھی جی کو عشق کی لاگ ہے ، ابھی آگ ہے
مرے لالہ رُو ، مرے خوشگماں، ابھی اور کِھل
فرح گوندل
