دشمن ہے گلے کا ہار آقا

دشمن ہے گلے کا ہار آقا
لُٹتی ہے مری بہار آقا

تم دل کے لیے قرار آقا
تم راحتِ جانِ زار آقا

تم عرش کے تاجدار مولیٰ
تم فرش کے با وقار آقا

دامن دامن ہوائے دامن
گلشن گلشن بہار آقا

بندے ہیں گنہگار بندے
آقا ہیں کرم شعار آقا

اِس شان کے ہم نے کیا کسی نے
دیکھے نہیں زینہار آقا

بندوں کا اَلم نے دل دُکھایا
اَور ہو گئے بے قرار آقا

آرام سے سوئیں ہم کمینے
جاگا کریں با وقار آقا

ایسا تو کہیں سنا نہ دیکھا
بندوں کا اُٹھائیں بار آقا

جن کی کوئی بات تک نہ پوچھے
اُن پر تمھیں آئے پیار آقا

پاکیزہ دلوں کی زینت ایمان
ایمان کے تم سنگار آقا

صدقہ جو بٹے کہیں سلاطیں
ہم بھی ہیں اُمیدوار آقا

چکرا گئی ناؤ بے کسوں کی!
آنا مرے غمگسار آقا

اﷲ نے تم کو دے دیا ہے
ہر چیز کا اختیار آقا

ہے خاک پہ نقشِ پا تمہارا
آئینہ بے غبار آقا

عالم میں ہیں سب بنی کے ساتھی
بگڑی کے تمھیں ہو یار آقا

سرکار کے تاجدار بندے
سرکار ہیں تاجدار آقا

دے بھیک اگر جمالِ رنگیں
جنت ہو مرا مزار آقا

آنکھوں کے کھنڈر بھی اب بسا دو
دل کا تو ہوا وقار آقا

ایماں کی تاک میں ہے دشمن
آؤ دمِ احتضار آقا

ہو شمعِ شبِ سیاہ بختاں
تیرا رُخِ نور بار آقا

تُو رحمتِ بے حساب کو دیکھ
جُرموں کا نہ لے شمار آقا

دیدار کی بھیک کب بٹے گی
منگتا ہے اُمیدوار آقا

بندوں کی ہنسی خوشی میں گزرے
اِس غم میں ہوں اشکبار آقا

آتی ہے مدد بَلا سے پہلے
کرتے نہیں انتظار آقا

سایہ میں تمہارے دونوں عالم
تم سایۂ کردگار آقا

جب فوجِ اَلم کرے چڑھائی
ہو اَوجِ کرم حصار آقا

ہر ملکِ خدا کے سچے مالک
ہر ملک کے شہر یار آقا

مانا کہ میں ہوں ذلیل بندہ
آقا تُو ہے با وقار آقا

ٹوٹے ہوئے دل کو دو سہارا
اَب غم کی نہیں سہار آقا

ملتی ہے تمھیں سے داد دل کی
سنتے ہو تمھیں پکار آقا

تیری عظمت وہ ہے کہ تیرا
اﷲ کرے وقار آقا

اﷲ کے لاکھوں کارخانے
سب کا تمھیں اختیار آقا

کیا بات تمہارے نقشِ پا کی
ہے تاجِ سرِ وقار آقا

خود بھیک دو خود کہو بھلا ہو
اِس دَین کے میں نثار آقا

وہ شکل ہے واہ وا تمہاری
اﷲ کو آئے پیار آقا

جو مجھ سے مجھے چھپائے رکھے
وہ جلوہ کر آشکار آقا

جو کہتے ہیں بے زباں تمہارے
گونگوں کی سنو پکار آقا

وہ دیکھ لے کربلا میں جس نے
دیکھے نہ ہو جاں نثار آقا

آرام سے شش جہت میں گزرے
غم دل سے نہ ہو دو چار آقا

ہو جانِ حسنؔ نثار تجھ پر
ہو جاؤں ترے نثار آقا

حسن رضا بریلوی