تم نے ہی مشکل میں ڈالا

تم نے ہی مشکل میں ڈالا تم نے ہی ناکام کیا
جس کا جتنا ظرف تھا اس نے خالی اتنا جام کیا

میں نے تجھ پر غزلیں لکھیں سب کچھ تیرے نام کیا
بستی راون والی تھی یہ میں نے جس کو رام کیا

تم نے میری قدر نہ جانی جیون بھر اپمان کیے
جس کے ہاتھ میں پیسے دیکھے اس کو ہی پرنام کیا

ساتھ چراغوں کے رہتا تھا اب میں ہوا کا ساتھی ہوں
تیرے پیار نے مجھ کو طوفانوں سا ہی ہر گام کیا

میں تو اوڑھے پھرتا تھا بس تیرے غم کی مالائیں
ہائے میرے درد کو جاناں تو نے کیوں احرام کیا

نگری نگری پھرتا تھا اور آنکھیں سب نا واقف تھیں
لیکن تیری اِیک نظر نے مجھ کو بھی گلفام کیا

تجھ کو جو دیکھے وہ کیسے اور بھلا کچھ بھی دیکھے
آنکھ نے تجھ کو دیکھا اور پھر جیون بھر آرام کیا

دیکھ خدا کی کرنی حاضر ایسے بھی دن آئے ہیں
دل کی چھوٹی سی کٹیا کو زخموں کا گودام کیا

احمد رضا حاضر