شان رب ذوالجلال

( پہلا حصہ )

میرے واجب الاحترام پڑھنے والوں کو میرا آداب

میرے واجب الاحترام پڑھنے والو
جو لوگ میری تحریریں باقاعدگی سے پڑھتے ہیں انہیں معلوم ہوگا کہ میری تحریروں میں اکثر تحریریں ایسی بھی ہوتی ہیں جو میں کسی سے متاثر ہوکر کہیں سے پڑھ کر ثواب جاریہ سمجھ کر اپنے الفاظوں میں ڈھال کر آپ تک پہنچانے کی کوشش کرتا رہا ہوں اج کی تحریر بھی جب میری نظروں سے گزری تو میں نے سب سے پہلے اس کے لکھنے والے کا نام تلاش کیا لیکن وہ شروع سے آخر تک کہیں نہیں ملا جبکہ یہ تحریر ایک حصہ میں نہیں تھی بلکہ ٹکڑوں میں تھی میں نے کوشش کی ہے کہ اس خوبصورت تحریر کو ایک خوبصورت تحریر بناکر اپنے الفاظوں میں ڈھال کرکے آپ تک پہنچائوں تاکہ آپ لوگوں کو پڑھنے میں آسانی بھی ہو اور سمجھنے میں تکلیف بھی نہ ہو لہذہ دل کو چھو لینے والی اس تحریر کو اج آپ لوگوں تک پہنچانے کی سعادت حاصل کررہا ہوں ۔
موضوع کے اعتبار سے آپ سمجھ گئے ہوں گے کہ آج کی تحریر میرے اور آپ کے خالق حقیقی اللہ رب العزت کی شان و شوکت کے بارے میں کچھ اپنے الفاظوں کا سہارا لیتے ہوئے بیان کرنے کی ایک ادنیٰ سی میری کوشش ہے ۔ میں جانتا ہوں کہ ایک عام انسان ہونے کے ناطے میری جرات نہیں کہ میں اللہ تعالیٰ کی شان و شوکت کے بارے میں کچھ لکھ سکوں کہ جس کی قدرت اور شان سے پورا قرآن بھرا ہوا ہے لیکن ایک لکھاری ہونے کے ناطے جو کوشش دنیا میں موجود بیشمار لوگ کرتے آئے ہیں اور رہتی قیامت تک کرتے رہیں گے بس اپنے آپ کو اپنے جیسے گناہگار کو ان لوگوں کی فہرست میں شامل کرنا چاہتا ہوں اس امید پر کہ اللہ تعالیٰ اپنی بارگاہ میں اپنے حبیب کریم صلی اللہ علیہ وآلہ وسلم کے صدقے و طفیل میری اس کوشش کو قبول و منظور فرمائے آمین آمین بجاہ النبی الکریم ﷺ ۔
میرے واجب الاحترام پڑھنے والوں دنیا میں جتنے مذاہب ہیں ایک تحقیق کے مطابق ہر مذہب کو ماننے والا یہ بات جانتا ہے کہ اس کرہ ارض پر واقع اس پوری کائینات کو اپنے مخصوص اور ناقابل یقین نظام کے تحت چلانے والا کوئی تو ہے لیکن جو ایمان کی دولت سے خالی ہیں وہ اللہ تعالیٰ کا نام لیتے ہوئے کتراتے ہیں بالکل ایسے ہی جیسے ہر مذہب کے پیرو کار اللہ تعالیٰ کے نام کو اپنے مذہب کے دیئے ہوئے نام سے پکارتا ہے کوئی رام کہتا ہے تو کوئی گاڈ کہتا ہے تو کوئی اللہ اور یہ سوال کہ
” کوئی تو ہے ” نے ایمان سے خارج لوگوں کو اس کی تہہ تک جانے پر مجبور کردیا ہے لیکن میرے اللہ کی شان و شوکت اور اس کے نظام قدرت کو سمجھنے کے لیئے کتنے ہی لوگ آئے اپنی پوری پوری عمر گزار کر دنیا سے بے ایمان ہی واپس چلے گئے لیکن وہ اس سوال کا جواب ڈھونڈھ نہیں پائے اور اللہ رب العزت نے جن لوگوں کو ایمان کی دولت سے سرفراز فرمایا ہے وہ یہ جانتے ہیں کہ اللہ تعالیٰ کی شان و شوکت کیا ہے کیونکہ اللہ تعالیٰ نے قرآن مجید میں اپنی قدرت اور اپنی شان و شوکت کو کھل کر بیان کیا ہے سورہ البقرہ میں ارشاد باری تعالیٰ ہے ۔
اِنَّ فِیْ خَلْقِ السَّمٰوٰتِ وَ الْاَرْضِ وَ اخْتِلَافِ الَّیْلِ وَ النَّهَارِ وَ الْفُلْكِ الَّتِیْ تَجْرِیْ فِی الْبَحْرِ بِمَا یَنْفَعُ النَّاسَ وَ مَاۤ اَنْزَلَ اللّٰهُ مِنَ السَّمَآءِ مِنْ مَّآءٍ فَاَحْیَا بِهِ الْاَرْضَ بَعْدَ مَوْتِهَا وَ بَثَّ فِیْهَا مِنْ كُلِّ دَآبَّةٍ ۪-وَّ تَصْرِیْفِ الرِّیٰحِ وَ السَّحَابِ الْمُسَخَّرِ بَیْنَ السَّمَآءِ وَ الْاَرْضِ لَاٰیٰتٍ لِّقَوْمٍ یَّعْقِلُوْنَ(164)
ترجمہ کنزالایمان::
بیشک آسمانوں اور زمین کی پیدائش اور رات و دن کا بدلتے آنا اور کشتی کہ دریا میں لوگوں کے فائدے لے کر چلتی ہے اور وہ جو اللہ نے آسمان سے پانی اتار کر مردہ زمین کو اس سے جِلا دیا اور زمین میں ہر قسم کے جانور پھیلائے اور ہواؤں کی گردش اور وہ بادل کہ آسمان و زمین کے بیچ میں حکم کا باندھا ہے ان سب میں عقلمندوں کے لئے ضرور نشانیاں ہیں۔
میرے واجب الاحترام پڑھنے والوں اسی طرح صحیح البخاری کی ایک حدیث میں حضرت ابوہریرہ رضی اللہ عنہ نے بیان کیا کہ میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرما رہے تھے کہ قیامت کے دن اللہ ساری زمین کو اپنی مٹھی میں لے گا اور آسمان کو اپنے داہنے ہاتھ میں لپیٹ لے گا۔ پھر فرمائے گا «أنا الملك،‏‏‏‏ أين ملوك الأرض» "آج حکومت صرف میری ہے، دنیا کے بادشاہ آج کہاں ہیں؟
( صحیح البخاری 4812 )
اسی طرح قرآن مجید کی بیشمار آیتوں اور سرکار مدینہ حضور ﷺ کی بیشمار احادیث میں ہمیں اللہ رب العزت کی شان و شوکت کے بارے میں پڑھنے کو ملتا ہے لیکن جس طرح بعض اوقات کوئی چیز سامنے موجود ہونے کے باوجود ہم اسے تلاش کررہے ہوتے ہیں کہ وہ یا تو ہمیں نظر نہیں آتی یا پھر ہمارا دھیان اس طرف نہیں ہوتا بالکل اللہ رب العالمین کی شان و شوکت کے نظارے اس کی قدرت کے جلوے ہمارے چاروں طرف بکھرے ہوئے ہیں لیکن ہم اس طرف غور نہیں کرتے جبکہ ہمیں غور کرنا چاہئے ہمیں سوچنا چاہئے کہ جب ہم صبح سورج کو نکلتے ہوئے دیکھتے ہیں صبح ہی صبح چڑیوں کے چہچہاتے ہوئے آسمانوں کی اڑتے ہوئے دیکھتے ہیں پھر شام کو ان پرندوں کو واپس اپنے اپنے گھروں تک آتے ہوئے دیکھتے ہیں پھولوں کے گرد شہد کی مکھیوں کو چکر لگاتے ہوئے دیکھتے ہیں تو ہمیں سوچنا چاہئے کہ ان خوبصورت مناظر میں رنگ بھرنے والا کون ہے ؟ یہ وہی رب ہے جس نے قرآن مجید کی سورہ الرحمن میں فرمایا کہ
فَبِاَیِّ اٰلَآءِ رَبِّكُمَا تُكَذِّبٰنِ(49)
تو اپنے رب کی کون سی نعمت جھٹلاؤ گے۔
میرے واجب الاحترام پڑھنے والوں ذرا سوچیئے بچہ ماں کے پیٹ میں کس طرح اپنے نو ماہ گزارتا ہے کس طرح اس کے وجود کا ہر حصہ اپنی جگہ پر آکر کام کرنے لگتا ہے دل کے دھڑکنے دماغ کے کام کرنے ہاتھ پائوں کے ہلانے سے لیکر بند جگہ میں وہ کس طرح سانس لیتا ہے یہ ماں کو بھی علم نہیں ہوتا نہ بچے کو یہ علم ہوتا ہے کہ اس کے دماغ میں کون کون سی کاریگری کی گئی ہے جسے وہ دنیا میں آنے کے بعد استعمال کرے گا آخر یہ سارا انتظام کرنے والا کون ہے ؟ یہ وہی رب ہے جو واحدہ لاشریک ہے اور جس نے بیشمار نعمتوں سے نوازنے کے بعد ہم سے قرآن مجید کی سورہ الرحمن میں پوچھا ہے کہ
فَبِاَیِّ اٰلَآءِ رَبِّكُمَا تُكَذِّبٰنِ(49)
تو اپنے رب کی کون سی نعمت جھٹلاؤ گے۔
ہمیں سوچنا چاہئے غور کرنا چاہئے کہ مکڑی کو جالا شہد کو چھتہ اور پرندوں کو گھونسلہ بنانا کس نے سکھایا کیا ان کا کوئی استاد ہے ؟ ذرا سوچیئے کہ کپاس سے کپڑے ، شہد سے شفاء دودھ میں غذایت چیونٹی کے لیئے ذرہ کبوتر کے لیئے دانہ بلیو وہیل کے لیئے ٹن و ٹن رزق کا انتظام کرنے والا آخر کون ؟
بھینس کو ذبح کرکے دیکھو ساری زندگی کام آنے والا دودھ نہیں نکلے گا مرغی کو ذبح کرو ساری زندگی کے لیئے انڈے نہیں نکلیں گے کسی پھل کو کاٹ کر دیکھو ساری زندگی کے لیئے پھل نہیں ملیں گے آخر کون ہے جس کا قانون قدرت اتنے نظم و ضبط کے ساتھ چل رہا ہے ؟ یہ وہی رب ہے جس کا ہم نے کلمہ پڑھا ہے اور اتنا بھرپور نظام چلاتے ہوئے وہ ہم سے قرآن مجید میں پوچھتا ہے سورہ الرحمن کے ذریعے کہ
فَبِاَیِّ اٰلَآءِ رَبِّكُمَا تُكَذِّبٰنِ(49)
تو اپنے رب کی کون سی نعمت جھٹلاؤ گے۔
ہمیں غور کرنا چاہئے کہ آخر وہ کون ہے ؟ جس نے ایک گندے نطفے سے جمے ہوئے خون میں تبدیل کرکے پھر اس سے ایک گوشت کے لوتھڑے میں تبدیل کیا اور پھر ہڈیاں چڑھا کر اسے لباس پہنا کر مکمل جسم میں تبدیل کرکے ایک انسان بنادیا اور پھر اپنی تمام مخلوقات میں اسے افضل بناکر اشرف المخلوقات کا درجہ دے دیا انسان کی تخلیق ہی اس رب کا کمال نہیں ہے بلکہ انسان کی بنائی ہوئی ہر چیز کے پیچھے انسانی دماغ کو سوچنے سمجھنے کی صلاحیت دیکر اس کے ذریعے اپنی مشیت کے تحت انسان سے چیز بنوالی اگر انسان خود چاہے تو کوئی چیز بنانا تو درکنار اپنی مرضی سے وہ قدم بھی چل نہیں سکتا پھر یہ مہربانیاں اور یہ کرم نوازیاں کرنے والا کون ہے ؟ بیشک یہ وہی رب ہے جو اپنی طاقت اور قدرت سے اس کائینات کے نظام کو چلاتا ہے اور قرآن مجید میں سورہ الرحمن کے ذریعے ہم سے پوچھتا ہے کہ
فَبِاَیِّ اٰلَآءِ رَبِّكُمَا تُكَذِّبٰنِ(49)
تو اپنے رب کی کون سے نعمت کو جھٹلاؤ گے
عزیزان من ہمیں سوچنا چاہئے کہ مرغی کے انڈے میں سفیدی بھی ہے اور زردی بھی لیکن یہ دونوں آپس میں کبھی مکس نہیں ہوتے کیا یہ مرغی کی کاریگری ہے ؟ یا کسی انسان کا کمال ؟ آخر اتنے نرم رس کے اوپر ایسا چھلکا اتنی خوبصورت بناوٹ یہ سب کس کی قدرت ہے ؟ کھانے پینے کی بیشمار نعمتیں کہیں سبزی ہے تو کہیں دال کہیں کڑاہی ہے تو کہیں سجی کہیں بریانی ہے تو کہیں شاندار حلیم کہیں آم کا جوس ہے تو کہیں سیب کا شیک کہیں اورنج جوس ہے تو کہیں پائن ایپل جوس آخر یہ اتنی ساری نعمتوں کی انسانوں کے لیئے مہربانیاں کرنے والا کون ؟ چاروں اطراف نظر گھمائیں تو کہیں اونچے اونچے پہاڑ ہیں تو کہیں اونچے اونچے درخت کہیں فصلیں ہی فصلیں ہیں تو کہیں پانی ہی پانی ہر چیز کو اپنے منظم طریقے سے چلانے والا آخر کون ؟ پہاڑی علاقوں میں برف باری اور میدانی علاقوں میں رحمت کی بارش برسانے والا گرمیوں میں ٹھنڈے پانی کی فراہمی اور سردیوں میں گرم پانی کی فراہمی آخر یہ کرم نوازیاں کرنے والا کون ؟ یہ وہی رب ہے جو ہم سے سب زیادہ پیار کرتا ہے اور قرآن مجید کی سورہ الرحمن کے ذریعے ہم سے پوچھتا ہے کہ
فَبِاَیِّ اٰلَآءِ رَبِّكُمَا تُكَذِّبٰنِ(49)
تو اپنے رب کی کون سے نعمت کو جھٹلاؤ گے
محترم پڑھنے والوں ہمیں ذرا سوچئے دنیا بھر میں بسنے والے انسانوں کے رنگ روپ آنکھ کان ناک ہونٹ شکل و صورت بول چال سب کے سب مختلف یہ ہی نہیں جانوروں کو دیکھیئے اونٹ کے ہونٹ ، بکرے کے کان ، ہاتھی کی سونڈ ، زیبرا کی گردن باز کی اڑان یہ سب کے اپنی مثال آپ ہیں آخر یہ ترتیب یہ ڈیزائیننگ کس کی ہے ؟ انسان اس دنیا میں کتنی ہی عمر گزار لے لیکن وہ انسان ہی ہوکر مرے گا جانور بھی جانور کی حالت میں مرے گا ہم نے کبھی یہ نہیں سنا کہ فلاں انسان اپنی زندگی کی آخری ایام کتا بن کر گزار گیا یعنی کتا ہوکر مرا یا کوئی جانور کسی انسانی شکل میں دنیا سے رخصت ہوگیا یہ ایک قدرتی نظام ہے لیکن اس نظام کو چلانے والا آخر ہے کون ؟زمین اپنے مدار میں چلتی رہتی ہے سورج اور چاند کائنات کی تخلیق سے لیکر اب تک اور رہتی قیامت تک اپنے وقت پر طلوع ہوتے ہیں اور اپنے وقت پر غروب اور اس وقت کا تعین کرنے والا کوئی تو ہے آخر ان سب کو اپنے حکم پر چلانے والا ان کا مالک کون ہے ؟ یہ وہی رب ہے جو ان سب کا مالک ہے بادشاہ ہے لافانی ہے جس نے اپنی ساری مہربانیوں اور کرم نوازیوں کو ہم ہر لٹاتے ہوئے اپنی کتاب قرآن مجید کی سورہ الرحمن میں ہم سے پوچھتا ہے کہ
فَبِاَیِّ اٰلَآءِ رَبِّكُمَا تُكَذِّبٰنِ(49)
تو اپنے رب کی کون سی نعمت کو جھٹلاؤ گے
میرے واجب الاحترام پڑھنے والوں شان رب ذوالجلال بیان کرنا ہماری طاقت نہیں کیونکہ اس طرح تو ہم لکھتے جائیں گے لیکن میرے رب تعالیٰ کی شان و عظمت مکمل ہی نہیں ہوگی لیکن یہ ہماری خوش قسمتی ہے کہ اللہ رب العزت نے ہمیں یہ توفیق بخشی کہ ہم اس کی شان و عظمت بیان کرسکیں مجھے مجبوراً اس تحریر کو دوسرے حصے کی طرف منتقل کرنا ہوگا اور دوسرے حصے میں ہم اللہ رب العزت کی شان و شوکت کے بارے میں مزید پڑھنے کی سعادت حاصل کریں گے انشاء اللہ آخر میں دعا ہے کہ اللہ تعالیٰ مجھے سچ لکھنے ہمیں پڑھنے سمجھنے اور اس پر عمل کرنے کی توفیق عطا فرمائے آمین آمین بجاہ النبی الکریم ﷺ مجھے دعاؤں میں خاص طور پر یاد رکھیئے گا اور دوسرے حصے میں ملاقات ہوگی انشاء اللہ ۔

محمد یوسف میاں برکاتی