سَرْمَسْت سوز و جذب و جنوں دِل پَسَند ہے
جِہدُالْبَقا تَوَکُّلِ کَامِل پَسَند ہے
وہ رہروِ طَلَب ہوں رہِ جستجوئے شوق
لیلیٰ جِسے پسند نہ مَحمِل پَسَند ہے
راہِ سُخنوری میں ہوں تلمیذِ با صفا
اِصلاحِ قلب رَہبَرِ کَامِل پَسَند ہے
آسُودَگی طَلَب ہے تُو رفعت کی راہ میں
کَشْفُ الوجود و روح تو بِسمِل پَسَند ہے
صد آفرین و آفریں ایسے حلیم پر
مجھ سا رہِ سلوک میں کاہِل پَسَند ہے
میرا سخن مُنزّہ ہے طَنز و مِزاح سے
عیش و طَرَب کی مجھ کو نہ محفِل پَسَند ہے
زِیرَک نہیں جو رمزِ نِیازی میں جان لے
یہ راہِ اِحتِیاج ہے ، عَاقِل پَسَند ہے
صَیّادِ بے مروت و بے درد و بے نوا
ہائے سِرِشکِ خُونِ عِنادِل پَسَند ہے
ہرگز وُقُوفِ قَلب سے غفلت نہ کیجئے
ہرگز نہ راہِ شوق میں غافِل پَسَند ہے
ہر ایک قید و بند سے ہے عشق بے نیاز
گرچہ خِرد اسیرِ سَلاسِل پَسَند ہے
مشقِ سُخَن ہو یا کہ رہِ اِفتِخارِ شوق
جامؔی عجیب شخص ہے مشکِل پَسَند ہے
شاہ محمود جامؔی
سیالکوٹ پاکستان
