ہمیں بے غرَض تری چاہتیں نہ نصیب تھیں نہ نصیب ہیں
ترا ہجر سہنے کی طاقتیں نہ نصیب تھیں نہ نصیب ہیں
کوئی حشر اٹھتا وجود میں کہ جو کرتا قلب کو کیمیا
وہ ہی جان لیوا قیامتیں نہ نصیب تھیں نہ نصیب ہیں
نہ ترا وصال تھا زندگی، نہ ترے فراق میں موت ہے
دل نارسا تجھے شدتیں ، نہ نصیب تھیں نہ نصیب ہیں
ترے درد مند کی کیا کہیں ابھی مبتلائے گمان ہے
کہ یقینِ صبح کی برکتیں نہ نصیب تھیں نہ نصیب ہیں
ترا عہد دل سے بھلانے میں ترا غم ہی ہم نے گنوا دیا
ہمیں عشق میں کبھی راحتیں نہ نصیب تھیں نہ نصیب ہیں
جو خوشی کی آس میں شام کو مِرا جستجوئے نظر بنے
مجھے اس قمر کی شہادتیں نہ نصیب تھیں نہ نصیب ہیں
یہ جو چاک داماں فقیر صحرا نورد ہے ترا آشنا
اسے ماسوا ترے حاجتیں نہ نصیب تھیں نہ نصیب ہیں
حنا بلوچ
