محترم محترم، یا نبیﷺ محترم

محترم محترم، یا نبیﷺ محترم
فخرِ روحِ اُمم، یا نبیﷺ محترم

جو ردائے عرب، جو شفیعِ عجم
آبروئے حرم، یا نبیﷺ محترم

طاقِ چشمانِ گریاں سے دل کا وضو
باوضو چشمِ نم، یا نبیﷺ محترم

عارضِ پاک شرم و حیا کی اساس
مہہ جبیں خوش شمیم، یا نبیﷺ محترم

چشمِ عالی پہ ابرو کی نازک کماں
اس پہ زلفوں کا خَم، یا نبیﷺ محترم

لب ہوئے برگِ گُل، رحم کی رہ گزر
ناک بابِ سَلَم، یا نبیﷺ محترم

آپ رحمت، محبت، شفاعت، کرم
ہیں عطائے مُنعِم، یا نبیﷺ محترم

قامتِ مصطفیٰ، بابِ صلِّ علیٰ
سر بہ سر خوش قدم، یا نبیﷺ محترم

جن کی خدمت پہ معمور قدسی ہوئے
ایسا جاہ و حشم، یا نبیﷺ محترم

ہر زبان و ادب، سارے شعر و سخن
آپ کے ہیں خَدَم، یا نبیﷺ محترم

تشنہ لب ہے غضب، کربلا، کربلا
ہائے درد و اَلم، یا نبیﷺ محترم

ہو عطائے حروفِ ثنا، یا نبی
منتظر ہے قلم، یا نبیﷺ محترم

ہم نہ ہوں گے، نہ ہوگی ثنائے نبی
یہ نہیں ہے دھرم، یا نبیﷺ محترم

اب تو دو ہی وظیفے ہیں وردِ زباں
میرا سوہنا حرم، یا نبیﷺ محترم

بزمِ کون و مکاں سج گئی اور سبب
آپ ہیں ذی حشم، یا نبیﷺ محترم

رحمتِ مصطفیٰ اور مصور کا دل
ایسا جود و کرم، یا نبیﷺ محترم

کیسے لائے مصور خیالِ دگر
آپ دل پر رقم، یا نبیﷺ محترم

سیدہ مصور صلاح الدین