آپ کا سلاماردو غزلیاتامن شہزادیشعر و شاعری
کوئی سپاہی نہیں بچ سکا نشانوں سے
امن شہزادی کی ایک اردو غزل
کوئی سپاہی نہیں بچ سکا نشانوں سے
گلی میں تیر برستے رہے مکانوں سے
یہ بردباری اچانک سے تھوڑی آئی ہے
کلام کرنا پڑا مجھ کو بد زبانوں سے
تمہارے ہاتھ سلامت رہیں تو شہزادے
یہ شال یوں ہی سرکتی رہے گی شانوں سے
ہماری راہ میں دیوار بن گئے وہ لوگ
جنہیں سنائی نہیں دے رہا تھا کانوں سے
تماشے یوں ہی نہیں کامیاب ہو جاتے
مکین کھینچ کے لائے گئے مکانوں سے
بہت سے شعر سنائے ہیں گنگنا کے مگر
یہ جنگ جیتی نہیں جا رہی ترانوں سے
امن شہزادی
