آپ کا سلاماردو غزلیاتشعر و شاعریمحمود کیفی

جُستجُو کے کسی جہان میں ہے

ایک اردو غزل از محمود کیفی

جُستجُو کے کسی جہان میں ہے
دل پرندہ ابھی اُڑان میں ہے

میں اُسے دیکھتا ہوں، وہ مجھ کو
صرف آئینہ درمیان میں ہے

پاس ہوگا کہ فیل ، کون کہے
دل محبت کے امتحان میں ہے

کاش ہوتی وہ حکمرانوں میں
ایک خوبی جو باغبان میں ہے

مار سکتا ہوں ، مر بھی سکتا ہوں
آخری تِیر بس کمان میں ہے

کر رہے ہیں بہت سے لوگ طواف
کچھ تو ہے، جو اِسی مکان میں ہے

ہے عجب علم کی دُوکاں داری
بِک رہا ہے مگر دوکان میں ہے

مجھ پہ طاری ہیں وحشتیں کیفی
خواہشِ وصل جسم و جان میں ہے

(محمود کیفی )

محمود کیفی

" مختصر تعارف " شاعر : محمود کیفی نام : محمودالحسن ولدیت : ظفراقبال تاریخ پیدائش : 23 فروری 1986ء گاؤں : گھُمنال ضلع : سیالکوٹ تحصیل : پسرور شعری مجموعے : " اِقرار محبت کا " اشاعت 2011ء / " کیفیت " اشاعت 2014 ء ۔ سینئر نائب صدر : بزمِ دوستانِ ادب سیالکوٹ ۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

سلام اردو سے ​​مزید
Close
Back to top button