یہ نور کس کا پھیل گیا ہے چمن چمن

یہ نور کس کا پھیل گیا ہے چمن چمن
شورِ دوام کس کا اٹھا ہے چمن چمن

شاہد ہیں برگ و بار بھی اس کی صفات کے
جلوہ نما بھی آپ خدا ہے چمن چمن

رنگِ خزاں کی زد سے ہے بالا جو ہر گھڑی
اک حسنِ لایزل کی بقا ہے چمن چمن

مردہ رگوں میں پھونک دی جس نے نئی حیات
لطفِ ازل کی بادِ صبا ہے چمن چمن

خوشبو کی جستجو میں جو پہنچی حریم تک
فریادِ عندلیبِ رسا ہے چمن چمن

ہر برگِ گل پہ آیتِ قدرت ہے جلوہ گر
دستِ قضا نے جو یہ لکھا ہے چمن چمن

پتے چٹک کے کرتے ہیں حمدِ قدوس و حی
ہر شاخ گویا محوِ ثنا ہے چمن چمن

پھولوں کے کھلنے، رنگ بدلنے کے کھیل میں
اک قادرِ مطلق کی ادا ہے چمن چمن

ظاہر ہے کائنات کے رنگوں میں وہ ہنوز
باطن میں اپنے آپ چھپا ہے چمن چمن

طائر چہک کے پڑھتے ہیں تسبیحِ ذاتِ حق
ہر اک گلو میں اس کی نوا ہے چمن چمن

عقل و خرد کی دوڑ تو ہے حدِ خاک تک
عاجزؔ تو محوِ دیدِ خدا ہے چمن چمن

ڈاکٹر الیاس عاجزؔ