گل بدن خاک نشینوں سے

گل بدن خاک نشینوں سے پرے ہٹ جائیں
آسماں اجلی زمینوں سے پرے ہٹ جائیں

میں بھی دیکھوں تو سہی بپھرے سمندر کا مزاج
اب یہ ملاح سفینوں سے پرے ہٹ جائیں

کرنے والا ہوں دلوں پر میں محبت کا نزول
سارے بوجہل مدینوں سے پرے ہٹ جائیں

میں خلاؤں کے سفر پر ہوں نکلنے والا
چاند سورج مرے زینوں سے پرے ہٹ جائیں

اب تو ہم ظاہری سجدے بھی ترے چھوڑ چکے
اب تو یہ داغ جبینوں سے پرے ہٹ جائیں

ممتاز گورمانی