تکلّم صد ملامت خیز سے

تکلّم صد ملامت خیز سے مت زخم کاری کر
تجھے مقصود ہو گر غمگساری، غمگساری کر

بہت غوغا سنا مطرب تری رنگیں نوائی کا
مرے ویرانہء دل میں بھی کچھ فصلِ بہاری کر

بجز افسونِ چشمِ بے بصر کچھ بھی نہیں دنیا
سکونت گہ برائے نام کی لمحہ شماری کر

جہانِ نو ملا تجھ کو خطائے فاش کے بدلے
مٹا دے داغِ دیرینہ یہاں یوں خاکساری کر

مُکافاتِ عمل ہے تُو جسے تقدیر کہتا ہے
فریبِ وصفِ ناقص میں نہ سنگِ زیست بھاری کر

اگر ہے آرزو تیری تُرابِ تن بنے گوہر
تو اعصابِ شکستہ پر خمارِ عجز طاری کر

سرائے رہ میں رختِ جاودانی رائگانی ہے
یہاں اے عاقل و دانا فقط تُو شب گزاری کر

او لطفِ خاص چہ گفتم چوں در ہنگامِ صحبت بود
میسّر باز گر آید گرفتش اُستواری کر

ابھی زیرِ زمیں تخمِ سخن ہے، کر نگہبانی
ابھی کِشتِ تخیّل کی فرید اور آبیاری کر

فرید احمد