"انسانیت سب سے بڑی عبادت ہے

خدمتِ خلق کا جذبہ ہی وہ سرمایہ ہے جو کسی معاشرے کو زندہ اور بامقصد رکھتا ہے۔ سیالکوٹ لائنز کلب نے گزشتہ روز ایک ایسا قدم اٹھایا جس نے نہ صرف درجنوں متاثرہ خاندانوں کو سہارا دیا بلکہ یہ بھی ثابت کیا کہ مشکل وقت میں انسانیت کا پرچم بلند کرنے والے لوگ آج بھی موجود ہیں۔

یہ پروجیکٹ بنیادی طور پر سیالکوٹ لائنز کلب کا تھا، تاہم اس میں سیالکوٹ سن شائن لائنز کلب اور سیالکوٹ جیمز لائنز کلب نے بھی بھرپور تعاون کیا، جس سے یہ خدمت مزید مؤثر اور منظم انداز میں ممکن ہوئی۔

یہ فلاحی سرگرمی سیلاب سے متاثرہ خاندانوں کے لیے ایک امید کی کرن تھی۔ اس میڈیکل اور امدادی کیمپ کے ذریعے سو سے زائد خاندانوں کو روزمرہ زندگی کی بنیادی ضروریات فراہم کی گئیں۔ اس کے ساتھ ساتھ ہزاروں مریضوں کا مفت طبی معائنہ کیا گیا اور انہیں ادویات بھی مہیا کی گئیں۔

اس کیمپ کی خاص بات یہ تھی کہ اس میں بارہ سے پندرہ کے قریب ماہر ڈاکٹرز نے اپنی خدمات پیش کیں۔ ان میں کارڈیالوجسٹ، ریڈیالوجسٹ، میڈیکل اسپیشلسٹ، چلڈ اسپیشلسٹ، آئی اسپیشلسٹ اور جنرل فزیشنز شامل تھے۔ یہ تمام ڈاکٹرز بلا معاوضہ شریک ہوئے اور انسانیت کی خدمت کو اپنا فرض سمجھ کر اس مشن میں حصہ ڈالا۔

کیمپ کے انعقاد میں سیالکوٹ لائنز کلب کے صدر لائن خالد وسیم نے نمایاں کردار ادا کیا۔ ان کے ساتھ پی سی سی لائن طاہر مجید کپور، لائن آفتاب ناگرہ اور دیگر اراکین نے بھی بھرپور شرکت کی۔ اس موقع پر کلب کے لیے اعزاز کی بات تھی کہ ڈسٹرکٹ گورنر لائن ڈاکٹر عارف مسعود نے خصوصی طور پر شرکت کی اور متاثرہ خاندانوں میں اپنے دستِ مبارک سے امدادی سامان تقسیم کیا۔

یہ کیمپ محض ایک دن کی سرگرمی نہیں تھی بلکہ ایک ایسا پیغام تھا جو پورے معاشرے کو جھنجھوڑتا ہے کہ اگر ادارے، کمیونٹیز اور افراد خلوصِ نیت کے ساتھ متحد ہو جائیں تو کوئی آفت، کوئی مصیبت انسانوں کو کمزور نہیں کر سکتی۔

سیالکوٹ لائنز کلب کا یہ اقدام نہ صرف متاثرہ خاندانوں کے لیے سہارا ہے بلکہ یہ ایک زندہ مثال ہے کہ انسانیت کی خدمت سب سے بڑی عبادت ہے۔ معاشرے کو ایسے ہی جذبوں کی ضرورت ہے تاکہ دکھ اور محرومی کی اندھیری راہوں میں امید کی روشنی ہمیشہ قائم رہے۔

 زاہد محمود خان