گفتگوئے یارِ من صد آفریں

گفتگوئے یارِ من صد آفریں
ایک اک حرفِ سخن ہے دلنشیں

ذرہ ذرہ روکشِ باغِ جناں
آستانِ یار ، حسنِ عالمیں

صحبتِ دِلبَر ، رُسُوخِ جاوِداں
محفلِ دِلبَر ، سرورِ ساتگیں

اللہ اللہ بارگاہِ یارِ میں
ہو گئے منظور یہ عجز و حزیں

عشق و مستی سوز و ساز و اضطراب
الفتِ جاناں نے بخشا کیا نہیں

مرحبا صد مرحبا یہ راہِ عشق
خار و خس ہے صورتِ لعل و نگیں

کہہ رہا ہے یہ دلِ مسرور کُن
ہیچ ہے اب خواہشِ حورانِ عیں

سُرمہِ چشمِ حزیں اہلِ دلاں
خاکِ نقشِ پائے خَتمُ المُرسَلِیں

جس کا درماں ہو نہ تیرا آستاں
درد ایسا لا دوا کوئی نَہیں

یہ ضیائے مشعلِ شمس و قمر
ایک ادنٰی تیری خیراتِ جبیں

دیکھ کر جامؔی ترا سوزِ دَرُوں
ششدر و حیران ہیں روح الامیں

شاہ محمود جامؔی
سیالکوٹ پاکستان