شہرِ سکوں میں باعثِ افتاد کون ہے

شہرِ سکوں میں باعثِ افتاد کون ہے
کس نے یہ جال بُن دیا ، صیاد کون ہے ؟

ایسا ہنر کہ خود پہ نہ الزام آ سکے
اے ماہرِ جفا ترا استاد کون ہے

اجڑے ہوئے ہیں لوگ بھی ، دل بھی ، مکان بھی
اس شہرِ بے امان میں آباد کون ہے ؟

اے قصہ گو ! یہ داستاں بے رنگ سی لگی
میں بھی نہیں تو شاملِ روداد کون ہے ؟

اک مسخرہ بھی مجھ پہ اب انگلی اٹھائے گا
افسوس ، دیکھیے مرا نقاد کون ہے ؟

اپنی انا کا دائرہ اپنی غرض کی جیل
سب لوگ قید ہیں تو پھر آزاد کون ہے ؟

کومل جوئیہ