علامہ اقبال کی ایک رباعی

خودی کی خلوتوں میں گُم رہا مَیں
خدا کے سامنے گویا نہ تھا مَیں
نہ دیکھا آنکھ اٹھا کر جلوۂ دوست
قیامت میں تماشا بن گیا مَیں

معانی: خلوت، تنہائی،خالی جگہ =گم رہا، کھویا ہوا،اوجھل، غائب=گویا، جیسے،مانند، ہوبہو =جلوہ دوست، محبوب حقیقی کا دیدار،خودنمائی، شان و شوکت

شرح: علامہ اقبال نے اس رباعی میں اپنی ذات کو موضوع بنایا ہے اور اپنی ذات کے متعلق ایک خیالی منظر نامہ(وقتی صورتحال) پیش کرنے کی کوشش کی ہے. روزِ محشر سب لوگ اکھٹے تھے اور محبوبِ حقیقی کا جلوہ دیکھنے میں مصروف تھے تو میں اس گھڑی بھی اپنے آپ میں کھویا ہوا تھا اور اس مرحلے پر بھی محبوبِ حقیقی کا جلوہ دیکھنے سے بے نیاز(بے پرواہ، بے غرض) رہا جس کا انجام یہ ہواکہ وہاں جمع لوگوں کے درمیان میری ذات تماشا بن کر رہ گئی. درحقیقت انا کا شکار شخص خود کے علاوہ کسی اور کو قابلِ اہمیت نہیں سمجھتا. وہ ہر وقت اپنی ذات کو ترجیح دینا پسند کرتاہے. یہی بنیادی وجہ ہے کہ محشر کے دن بھی جب اللہ تعالیٰ کے جلوؤں کا اثر ہر جانب ہوگا،انا کا حامل شخص اُس دن بھی اپنی ذات کے اردگرد بھٹک رہا ہوگا. حتیٰ کہ روزِ قیامت گناہ گار بھی اپنے پیدا کرنے والی کی طرف متوجہ ہوگا.

شارح :حمیرا جمیل، سیالکوٹ
رُکن اقبال ریسرچ انسٹیٹیوٹ ،لاہور