آپ کا سلاماردو غزلیاتشعر و شاعریکلیم احسان بٹ
نثار جاؤں ترے، پیار کر کے دیکھ تو لوں
کلیم احسان بٹ کی ایک اردو غزل
نثار جاؤں ترے، پیار کر کے دیکھ تو لوں
ذرا ٹھہر میں تجھے آنکھ بھر کے دیکھ تو لوں
یہ زندگی تو یونہی رائیگاں گزرتی ہے
وہاں بھی کیا ہے چلو آج مر کے دیکھ تو لوں
ذرا کھلے تو سہی تجھ پہ اس ہوا کا مزاج
ذرا کمال ترے بال و پر کے دیکھ تو لوں
مرا نصیب سفر ہے تو پھر سفر ہی سہی
میں چار دن ہی سہی اپنے گھر کے دیکھ تو لوں
جواب کیا ہے مجھے کچھ غرض نہیں اس سے
جواب ہاتھ میں بس نامہ بر کے دیکھ تو لوں
کلیم احسان بٹ
