ہر سمت جبر و ظلم کی تاریک شام ہے
محبوس ہے عوام ، اپاہج نظام ہے
کربِ نہاں لیے ہوئے شانوں پہ اب تلک
زندہ ہوں اس لئے بھی کہ مرنا حرام ہے
دیکھو تو کشتِ دل ہے بظاہر ہری بھری
باطن میں کل حیات مِری تشنہ کام ہے
لوحِ قضا پہ نقش ہے کنجِ لحد فقط
رختِ سفر کا پھر بھلا کیا انتظام ہے؟
ہے التجا یہ ماؤں سے غنچے سنبھالئے
بھنورا صفت نفوس کا اک اژدہام ہے
گردِِ ملال ،اشک ِ رواں ، قفلِ لب سہی
سوزِ دروں کا لطف مگر لالہ فام ہے
طوقِ گراں کو توڑ کے جینا ہے اب تجھے
اہلِ خرد سے رانی توُ کیوں ہم کلام ہے!
روبینہ صدیق رانی