زمیں کی بات کرتے ہیں

زمیں کی بات کرتے ہیں نہ آسماں کی بات کرتے ہیں
حضورِ شاہِ کلِ جہاں کی بات کرتے ہیں

ہمارے آس پاس کی یہ روشنی انہی کے دم سے ہے
یہ زمزمے، یہ چاندنی انہی کے دم سے ہے
شعور و آگہی، یہ بندگی انہی کے دم سے ہے
عنایتیں، نوازشیں، کرم، عطا
بدن میں تازگی انہی کے دم سے ہے
یہ حسن یہ جمالِ دو جہاں
یہ سادگی انہی کے دم سے ہے
ناممکنات میں وہ ممکنات ہیں
مرا عقیدہ ہے
وہ مقتصد، وہ روح مقصدِ نظام کائنات ہیں
وہ دینِ حق کی شش جہات ہیں
وہ آئینہ جمال کی حیات ہیں
تمام منزلوں کے راستے انہوں نے اپنے ہاتھ سے بہم کیے
ستم سہے مگر کرم کیے
ہمیشہ مہرباں رہے، تو مہرباں کی بات کرتے ہیں
حضورِ شاہِ کلِ جہاں کی بات کرتے ہیں

یہ حکمتیں، یہ معجزے انہی کے فیض سے عیاں ہوئے
خوشا کہ ان کی اک
صدائے حق پہ بے زباں بھی ان کے ہم زباں ہوئے
دل و دماغ کو خبر کہاں!
کہ ان کے تذکرے کہاں کہاں ہوئے
سکونِ قلب مل گیا
یقیں کے قافلے رواں دواں ہوئے
جو ان کے نقشِ پا پہ چل دیے
زمیں پر رہ کے بھی وہ آسماں ہوئے
خدائے وحدہ کے ترجماں کی بات کرتے ہیں
حضورِ شاہِ کلِ جہاں کی بات کرتے ہیں

وہ چاند سے حسین ہیں
وہ آفتابِ علم و دین ہیں
وہ وارثِ علومِ اولین ہیں
وہ واقفِ امورِ آخرین ہیں
بلا شبہ وہ آخری مبین ہیں
وہ سید الانام ہیں
وہ مقتدائے کلِ جہان ہیں
یقینِ حق کی جان ہیں
ہمارے واسطے وہ سائبان تھے، وہ سائبان ہیں
سنو کہ سائباں کی بات کرتے ہیں
حضورِ شاہِ کلِ جہاں کی بات کرتے ہیں

شاعر: سہیل احمد صمیم
کتاب: الی النور