آپ کا سلاماردو غزلیاتشازیہ اکبرشعر و شاعری
یوں ہم سے نگاہیں نہ چرایا کرو جاناں !
شازیہ اکبر کی اردو غزل
یوں ہم سے نگاہیں نہ چرایا کرو جاناں !
غیروں کی طرح تم نہ ستایا کرو جاناں !
شرمندۂ تعبیر ہوں لازم تو نہیں ہے
ہاں ! خواب تو آنکھوں میں بسایا کرو جاناں !
ہم تم کو بھلانے کی کریں گے کوئی تدبیر
تم بھی تو ہمیں یاد نہ آیا کرو جاناں !
کھلتے نہیں صحرا میں گل و لالہ تو کیا غم
کانٹے ہی محبت سے اُگایا کرو جاناں !
ہم پیار جتانے کو اگر روٹھ ہی جائیں
تم پیار نبھانے کو منایا کرو جاناں !
سنتے ہیں دعاؤں سے بدل جاتی ہے قسمت
تم ہاتھ یقیں سے تو اٹھایا کرو جاناں !
شازیہ اکبر
