شَجَرِ شعر کے پَھل سُرخ ، ہری شاخِ سُخَن

شَجَرِ شعر کے پَھل سُرخ ، ہری شاخِ سُخَن
خون سے سینچا، غزل بار ہوئی شاخِ سُخَن

کُن کے اعلَان سے تا نہجِ بَلَاغہ اک رَمز
کارِ تَخلِیق میں شہکار بنی شاخِ سُخَن

ظرف امکان سبوچہ تو زمانہ ہے شراب
آسمانوں کی صراحی پہ بنی شاخِ سُخَن

عشق کے باب میں جب ذکرِ وفا آیا ہے
مجھ تلک بڑھتی چلی آئی تری شاخِ سُخَن

رقص، دَھمَّال کی بابَت جو کہا مَعبَد میں
ضربِ وَاعِظ سے مری ٹوٹ گئی شاخِ سُخَن

بے زبانی کی کڑی دھوپ، تپِ ریگِ کلام
ایسے موسم میں مرے سر پہ کُھلی شاخِ سُخَن

میرے الفاظ ترے حسن پہ گل پاش رہے
دستِ ابدال میں ہر وقت رہی شاخِ سُخَن

عامر ابدال