A True Salam To Urdu Literature

Nayee Taabeer Ke Badlay

An Urdu Ghazal By Ayub Sabir

نئی تعبیر کے بدلے پرانے خواب بِکتے ہیں
ذرا قیمت بڑھا دو تو یہاں نایاب بِکتے ہیں

جسے زاہد سمجھتے ہیں وہی تاجر نکلتا ہے
یہاں مسلک کی خاطر منبر و محراب بِکتے ہیں

جہاں گھوڑے گدھے کے درمیاں تفریق مٹ جائے
وہاں زاغوں کی قیمت پر کئی سُرخاب بِکتے ہیں

عطا ہوتی ہے خِلعت دیکھیے ایمان کے بدلے
سنا ہے شاہ کے دربار میں القاب بِکتے ہیں

جہاں خوددار لوگوں کی کوئی قیمت نہیں لگتی
وہاں پر سستے داموں رستم و سہراب بِکتے ہیں

بڑے طوفاں نظر آتے ہیں طاقت کے سمندر میں
جو کشتی کو ڈبوتے ہیں وہی گرداب بِکتے ہیں

جہاں لفظوں کی حُرمت کا جنازہ اُٹھ گیا صابرؔ
وہاں شہرت کی منڈی میں کئی احباب بِکتے ہیں

Leave A Reply

Your email address will not be published.

Recommended Salam
An Urdu Ghazal By Ayub Sabir